الواعر شرف الكرسي

نعيش في عصرنا هذا يا ويدا

كيف مايقولوا كل جيل يضحك لجيله

اعترفلنا بسر عمرك ما اعترفت بيه لحد ؟؟؟؟؟؟؟؟؟؟؟؟؟

ليش ما تقدرش !!!!!!!!!!!!!!!!!!!!!

عدنا

ايش كان شعورك لما شفتني اول مرة؟ولما حكيت معاي؟ولما قرمت عيت ....؟
وليش عمري ماشفتك داير عركة في ناصر؟؟
وكيف كنت فاعد انت ومنير واكرم في درج واحد ؟؟
لو كان ايرد بيك الوقت المن اتقول سامحني؟؟
والمن تعتذر عن صداقته؟؟
احسن قبيلة عندك خاطي الحاسة؟؟
القبيلة الي ماتقبلهاش؟؟
احسن عضو في المنتدى؟؟
انت اتجامل اشوي؟؟ليش؟؟
انت عمرك ماحكيت مع بنت وجها لوجه
لكن ع الإيميل والنيم والملتقيات لاقوة ليش ضعف شخصية ؟؟
عكسي تماما
شن رايك في البنات في ليبيا؟؟
والشباب؟؟
وانت دائما اتقول في مقولة عجبتني شنو هي؟؟
لوكان قالولك اختار شخصية خاطي شخصيتك لكن خوذ شخصية واحد من جماعتك تاخذ شخصية من؟؟
هل انت حاليا تمر بقصة حب او على وشك القوع في شيئ من هذا القبيل؟؟
لوكان عندك امنية لمن تعطيها من أصحابك؟؟
لكان قالولك تمنى لكل صاحب امنية شن اتمنى لكل شخص وليش؟؟
لوكان ضرك واحد من اصحابك اتسامحة ؟؟
أكثر حاجة ندمت عليها في حياتك؟؟
صديق اتقولا الله يسامحك؟؟
صديق دار فيك موقف مةش أوي؟؟
صديق لوكان في يدك الموت تطلق عليه؟؟
انت وزنك كم؟؟
طولك كم؟؟
ليش انت تنبال؟؟
ليش ماتحركش وماادير في شي في الزرادي؟؟
ليش ديما غالي عليك اتزعم كبد البشرية الي جنبك؟؟
اكثر حاجة ماندمتش عليها في حياتك؟؟
ايش العيوب الي في انا وتبي اتغيرهن؟؟
ايش الميزة الي في مع اني كلي عيوب؟؟
اذكر ميزة وعيب في كل صديق او الجماعة بالمعنى الاصح؟؟
اكثر واحد من الجماعة اتقرم فيه؟؟
ولي عودة
سلامات

هلااااااااااااااااااا

كيفكم و كيف كرسي الاعتراف مع العضو المميــــــــــــــــــــــــــــز الواعر

انا جيتك بأسئلتي

شذى شن رايك فيها

احسن عضو وعضوه اتعرفت عليهن في المنتدى

لاعبك المفضل

((في القدم والسله والتنس))

باهي
اممممممممممممممم


شن تاني

اخر مكلمه اليوم درتها

شن درت قبل ساعه

يلا خلاص سادك

ليا رجعه ان شاء الله

سلااااااام

تي وين اتحطوا في اسئلة هو مختفي عن الانظار خييييير انشالله

المنبي كتب:

عدنا

ايش كان شعورك لما شفتني اول مرة؟ولما حكيت معاي؟ولما قرمت عيت ....؟

بصراحه اول مره شفتك فيها خذيت عليك فكره غلط انك ثقيل وتسخف واجد وتخفف في دمك بس بعد بدينا نقرموا في عيت بوحويه انسجمت هههههه

وليش عمري ماشفتك داير عركة في ناصر؟؟

وين عايش درت 3 عرايك تقريبا ووحده منهن مع رؤوف مان
يش حاكيها لك بس
وكيف كنت فاعد انت ومنير واكرم في درج واحد ؟؟
منير واكرم هذوم معزتهم كبيره عندي وماكنا ننسجموا الا لما نقعدوا مع بعضنا في درج واحد وانت عارف انا نحنا نقدروا ناخذو حتي عشرين درج بس منسجمين مع بعضنا

لو كان ايرد بيك الوقت المن اتقول سامحني؟؟
ولا واحد عمري ماندمت علي حاجه درتها

والمن تعتذر عن صداقته؟؟

اياد
احسن قبيلة عندك خاطي الحاسة؟؟

البراعصه بالذات الخزاعل والسعيطات
القبيلة الي ماتقبلهاش؟؟

مع احترامي بس الدرسه

احسن عضو في المنتدى؟؟

ويدا ناشطه وواضح انها تحب المنتدي

انت اتجامل اشوي؟؟ليش؟؟

كلمت الحق وجاعه ونخاف نقولها مرات يفهموني غلط
انت عمرك ماحكيت مع بنت وجها لوجه
لكن ع الإيميل والنيم والملتقيات لاقوة ليش ضعف شخصية ؟؟
عكسي تمام

معاك حق كلامك صح 100% بس انت عارف اسبابي
والله في نظري ان الكلام مع البنات في الجامعه تشويه سمعه فقط لاغير ومانرظاها لهن انا لذلك اجمل شي انك تكون صديق من بعيد لبعيد وابعد عن الشر وغنيله بعدين عمرك شفت بنت حكت معاي وتحشمت منها لا بالعكس واصلا قريت من ايام الابتدائي والاعدادي وانا نقرا معاهن وكنت نحكي معاهن بس بحكم تجربه اكتشفت ان الشي هذا غلط

شن رايك في البنات في ليبيا؟؟
والشباب؟؟

احسن شباب وبنات لو تشوف اللي برا وبالذات عرب البيضاء مازالوا طيبين

وانت دائما اتقول في مقولة عجبتني شنو هي؟؟

واجد مقولاتي داير دوت الشياب (رحيل هلك لو كان كلاب)

لوكان قالولك اختار شخصية خاطي شخصيتك لكن خوذ شخصية واحد من جماعتك تاخذ شخصية من؟؟

مافيهم بركه هم كلهم للأسف شخصياتهم فيها شي مالضعف والسبب اللي خلاني نحكي هكي عدم تحمل المسؤليه وانت عارف انها ديما جايه علي راسي
بعدين واحد نقصي وواحد متنح وواحد عبيط وواحد رومانسي وواحد مريض يوفي ايش نبي فيهم هههههههههه

هل انت حاليا تمر بقصة حب او على وشك القوع في شيئ من هذا القبيل؟؟

لالالالالا فكنا الله هكي متريح

لوكان عندك امنية لمن تعطيها من أصحابك؟؟

للخزعلي لانه يستاهل كل خير ولك لنت

لكان قالولك تمنى لكل صاحب امنية شن اتمنى لكل شخص وليش؟؟
لك انت نتمني انك تفوت البنات اللي ساكناتلك
لأحمد بومه اصفار خخخخخ
انتمنالهم كل خير

لوكان ضرك واحد من اصحابك اتسامحة ؟؟

اكيد ومستحيل نمد ايدي عليه بس لو اعتذر حانسامه غيرها نعتبراني ماعرفتش اصلا

أكثر حاجة ندمت عليها في حياتك؟؟

مافي شي نادم عليه

صديق اتقولا الله يسامحك؟؟

قزقيزه

صديق دار فيك موقف مةش أوي؟؟

بالقاسم بس مستحيل نزعل منه

صديق لوكان في يدك الموت تطلق عليه؟؟

بعيد السو

انت وزنك كم؟؟
3000000000

طولك كم؟؟

14سم

ليش انت تنبال؟؟

طبعي هكي وكان نتخلص منه ندير حل علي روحي

ليش ماتحركش وماادير في شي في الزرادي؟؟

لأن اللي ينظم ويجيب في الدبش ويطيح اسعده في التكليم وحرق الكروت عليكم هو انا لذلك انجي داهش للزرده ولو تريحوني نشتغل في الزرده

ليش ديما غالي عليك اتزعم كبد البشرية الي جنبك؟؟

اولاد خالتك حاسه عدي اسألهم
هذا طبعي ياونيس غالي علي الإستفزاز والتنكيد علي العرب اللي ادير فيه امي لي اندير فيه للعرب

اكثر حاجة ماندمتش عليها في حياتك؟؟

اني عرفت اصحابي

ايش العيوب الي في انا وتبي اتغيرهن؟؟

اتهكم واجد عالعرب وكل يوم براي بس انت تمام بكل وعاجبني وراه من النادر اني نشكر صاحبي في وجه

ايش الميزة الي في مع اني كلي عيوب؟؟

طيب وكريم وجنتل وعمرك ماقصرت وعندك خوت علي كيفك

اذكر ميزة وعيب في كل صديق او الجماعة بالمعنى الاصح؟؟
الخزعلي :خوي وصاحبي ورفيقي واكثر واحد نتريح معاه وانت كذلك ,وعيبه انه خجول زياده عن اللزوم
رافع :اطيب رجل في العالم
وهي نفسها عيبه لأنه حقه ديما ساكت عنه
حوته :صاحب صاحبه وراجل يعجبك مايديرش العيبه لكن عيبه العصبيه
قزقيزه :طيب وماتسمع منه اللي توجع لكن مرات تسيرله حاله يختفي عن الانظار
بالقاسم:جنتال وكريم وطرطاش وهذا عيبه طرطاش بكل
حسين طيب بس هبل
انور كويس وطيب ونيته بيضاء بس هرجته واجد وراسه امسكر
ونيس:حكيت عليك بدري


اكثر واحد من الجماعة اتقرم فيه؟؟

علي حسب الظروف وحسب الاخبار الجديده بس غالبا مانرحم حد
ولي عودة

سلامات

راك سكنت معش اديرها
نبصر خوذ راحتك

به يالواعر كثروا الاسئلة لكن تحمل هي خليني نبدا
من اكثر عضو عندك الفضول لتشوف وجه
شن ابيخ حاجة فيك
شن اكثر اكلة تحب تاكلها وتمنى انها يوميا تاكلها

السلام عليكم

انا عضوه جديده بس جبيت نسأل كم سؤال
هدا طبعا ادا سمحت

بس ياريت لو جاوبت اتكون اجوبتك صريحه

ايش رايك في البنت اللي مشتركه في منتديات ؟؟ هل في نظرك هي دارت غلط؟؟
ليش الشباب ديما ينظروا للبنت اللي ع النت انها مش كويسه ويقعدوا يسفتروا عليها سوا كانت محترمه او غير دلك؟؟
هل انت منهم اعني هل انت نفس التفكير؟؟
يا ريت لو اتجاوب بصراحه؟؟
ليش الشباب لما يلقوا بنت ومؤدبه وفي حالها ايقولوا عليها معقده وهي مش هكي؟؟ ومتخلفه وتبيلها تطوير؟
ولا مش هكي بس ايقولوا عليها عجوز من العصر الحجري؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
هل انت من المدخنين؟؟
اد كان نعم لمادا التدخين ؟؟وليش فكرت في التدخين
اد كان لا ايش تنصح المدحنين؟؟
ايش البلاد اللي زرتها؟؟

ما هو نوع الشوكلاته المفضل؟؟
هل الدكاء يعتبر احيانا خبث؟؟يعني الانسان يقعد خبيث؟؟

ليش الشباب ديما ماشيين زرادي؟؟؟
مشكور اخي ولو ما تبيش اتجاوب عادي جدا

السلام عليكم يالوعر حايتك باسئلة ثقيلة شوي لكن ياريت اتجاوبهن
كم مرة صارت معاك قصة حب
هل انت نادم ع قصة معينة
كم عندك صديقة
شن المواصفات يلي تمناهن لزوجة المستقبل
هل عمرك حسيت نفسك معليش اعذرني في الكلمة انسان تافه
هل انت من النوعية المستهزئة ع البنات
هل عمرك عاكست بنت
صح اسئلة بايخة لكن نتمنى انك تجاوبهن بصراحة ومعليش
ليا عودة

به يالواعر انتى قلت انك تخاف ع خواتك والنت ديمى انتى تراقب فيهن به عليش ماتخاف ع بينات الناس كيف ماتخاف ع خواتك لانه مره سالك المنبي قالك انتى ديمى تحكي مع البنات ع النت وماشاء الله عليك يعني مش خايف ع سمعتهن